ក្រ៤យ៉ាង

 

ក្រទី១ ក្រលុយ គឺគ្មានលុយគ្រប់គ្រាន់សំរាប់ចិញ្ចឹមជីវិតខ្លួនឯង ឬគ្មានលុយគ្រប់គ្រាន់សំរាប់មើលថែមនុស្សជាទីស្រលាញ់យើង ។

ក្រទី២ ក្រពេល គ្មានពេលប្រើប្រាស់ជីវិតអោយបានពេញលេញ គ្មានពេលធ្វើនូវរឿងអ្វីដែលខ្លួនឯងចង់ធ្វើ

អ្នកខ្លះមានលុយតែគ្មានពេលប្រើប្រាស់វា អ្នកខ្លះមានពេលវេលាតែគ្មានលុយសំរាប់ចាយ ហើយក៏មានអ្នកខ្លះទៀតកាន់តែធ្ងន់ធ្ងរជាងនេះ គ្មានទាំងលុយ គ្មានទាំងពេល ដល់ពេលចឹងភាគច្រើនតែងតែនាំគ្នាទៅបន្ទោស ក្រទី៣

ក្រទី៣ ក្រឱកាស គឺគ្មានឱកាសដែលល្អៗចូលមកកាន់ជីវិតរបស់ខ្លួន

មនុស្សជាច្រើនតែងត្អូញត្អែថា ខ្ញុំខំព្យាយាមហើយ ហេតុអ្វីមិនជោគជ័យ គ្មានលទ្ធិផលល្អអ្វីសោះ

តាមពិតទៅយើងគួរតែយល់អោយច្បាស់ថា មនុស្សដែលជោគជ័យគ្រប់គ្នាសុទ្ធតែត្រូវឧស្សារហ៍ព្យាយាម ប៉ុន្តែមនុស្សឧស្សារហ៍ព្យាយាម ក៏មិនទាំងអស់ដែរ ដែលជោគជ័យ ព្រោះព្យាយាមខុសផ្លូវមិនដែលគិតបត់រកផ្លូវផ្សេង ទោះ១០ឆ្នាំទៀតក៏មិនមានទៅណាកើតដែរ

ប្រសិនបើធ្វើការធ្ងន់តែម្យ៉ាងហើយអាចមានធូរធារ ចឹងយើងសាកក្រឡេកទៅមើល កម្មករលីសែង អ្នកធ្វើស្រែ បើប្រៀបធៀបពីភាពឧស្សារហ៍ព្យាយាមរវាងពួកគាត់ជាមួយអ្នករស់នៅទីក្រុងតើអ្នកណាឧស្សារហ៍ជាង ?

ដូចនេះបើខំធ្វើតែម្យ៉ាងមិនគ្រប់គ្រាន់ទេ យើងត្រូវមានភាពវ័យឆ្លាតថែមទៀតទើបប្រសើរ

ឱកាសល្អមានម្តងហើយ មិនប្រាកដថានឹងកើតមានជាថ្មីម្តងទៀតទេ

ប្រសិនបើវាមកដល់ហើយគួរតែចាប់វាអោយជាប់។ តែតាមតថភាពពិតភាគច្រើនយើងខ្លួនឯងតែងតែបដិសេធរុញច្រានឱកាសនោះចោល ចឹងហើយទើបបានជាមាន ក្រទី៤

ក្រទី៤ ក្រគំនិត ព្រោះរវល់តែគិតមើលងាយលើសម្ថភាពរបស់ខ្លួនឯង គិតអវិជ្ជមាន គិតនូវអ្វីដេលមិនមែនជាប្រយោជន៍ គិតតែរឿងដែលរារាំងភាពជោគជ័យរបស់ខ្លួនឯង គិតថាខ្លួនឯងធ្វើមិនបាន ហើយក៏បណ្តោយអោយឱកាសនោះបាត់បង់ទៅ

ក្រលុយ ក្រពេល ក្រឱកាសល្អៗ នៅអាចនៅផ្លាស់ប្តូរជីវិត តែបើក្រគំនិត មួយជីវិតនឹងគ្មានអ្វីផ្លាស់ប្តូរ

ថ្ងៃនេះ នៅពេលដែលមានអ្នកមើលងាយយើង យើងមិនចូលចិត្តទេមែនទេ ?

បើយើងមិនចូលចិត្ត ហេតុអ្វីយើងនៅមើលងាយខ្លួនឯង ?

ទោះជាមានមនុស្សរាប់រយនាក់ប្រាប់ថាយើងអាចធ្វើបាន តែបើយើងនៅតែចិញ្ចឹមចិត្តប្រាប់ខ្លួនឯងថា យើងធ្វើមិនបានក៏វានៅតែគ្មានប្រយោជន៍អ្វីដដែល ៕